Skessuhorn:

Stefnir í fimmtíu prósenta áburðarhækkun

13. febrúar 2009

“Fóðurblandan hefur sent viðskiptavinum sínum verðlista yfir áburð fyrir árið 2009 og hefur Bændablaðið slíkan lista undir höndum,” segir í frétt á vef Bændasamtakanna. Þar er upplýst að verðlistar frá Fóðurblöndunni hafi verið póstlagðir í gær en einhverjir umboðsmanna Fóðurblöndunnar voru þegar farnir af stað og byrjaðir að kynna bændum vöruval og verð. Veruleg hækkun er á áburði frá síðasta vori hjá fyrirtækinu. Verðhækkun á algengum tegundum áburðar er á milli 45 til 55% milli ára, en í fyrra hækkaði áburðarverð um allt að 80% frá 2007. 

"Þetta eru mjög skuggalegar fréttir fyrir bændur og víst er að margir íhuga vel sína stöðu áður en keyptur er áburður," sagði Tjörvi Bjarnason hjá Bændasamtökum Íslands í dag þegar þessar upplýsingar lágu fyrir.

Tonnið af Magna 1 kostar til að mynda 59.800 krónur hjá Fóðurblöndunni í ár ef 10% pöntunarafslátur er reiknaður inn í verðið. Í fyrra var upphæðin 38.500 krónur. Hækkunin á milli ára er því 55,3%. Tonn af áburðartegundinni Græði 9 kostar með 10% pöntunarafslætti 72.390 krónur, sem er 46,5% hækkun. Af þessum tölum að dæma má gera ráð fyrir að meðaltalshækkun á áburðarverði í ár geti legið nálægt 50 prósentum.

Fóðurblandan er fyrsta fyrirtækið sem starfar sunnan heiða til að upplýsa um væntanlegar verðhækkanir á áburði. Áður hafði fyrirtækið Búvís upplýst norðlenska kúabændur um áburðarsölu norðan heiða. Búvís hyggst einungis bjóða bændum á Norðausturlandi áburð til kaups í vor og er verð fyrirtækisins talsvert fyrir neðan verð Fóðurblöndunnar. Búvís kaupir einn skipsfarm af áburði og stefnir að því að skipa áburðinum upp í tveimur höfnum; á Akureyri og á Húsavík. Sparisjóður Suður Þingeyinga hefur boðið bændum að lána fyrir áburðarkaupunum þar.