 Vegna óhagstæðs tíðarfars hafa fráveituframkvæmdir í Borganesi gengið hægar en áætlanir gerðu ráð fyrir. Veðurfarið hefur m.a. leitt til tafa við að sjóða saman plastpípur og vinnu við jarðvegsfyllingar. Samkvæmt verkáætlun verktakans Ístaks er nú gert ráð fyrir að hleypa umferð á Digranesgötu, Klettavík og hluta Borgarbrautar, frá Brúartorgi og að Menntaskóla Borgarfjarðar, fyrir páska. Áfram verður þó einstefna frá þjóðvegi og inná Digranesgötu vegna dælubrunns sem verið er að byggja þar og eins verður Borgarbraut áfram lokuð um sinn frá Menntaskóla að Böðvarsgötu. Þetta kemur fram í tilkynningu frá Jökli Helgasyni forstöðumanni framkvæmdasviðs Borgarbyggðar. Samkvæmt tilkynningunni er ljóst að fráveituframkvæmdirnar verða að miklum þunga víða um Borgarnes í allt sumar.
|
