 Landskjörstjórn fyrir næstu alþingiskosningar mælist til þess við yfirkjörstjórnir að auðir og ógildir seðlar verði aðgreindir í kosningunum 25. apríl nk. Ástráður Haraldsson, formaður landskjörstjórnar, sagði í samtali við RUV í gær búast við að yfirkjörstjórnir verði við þessum tilmælum. Í skoðanakönnun Capacent Gallup, sem gerð var í lok mars, kom fram að 12% kjósenda ætli annað hvort ekki að kjósa eða skila auðu. Fjöldi auðra seðla og ógildra er gjarnan gefinn upp sem ein tala, mörgum kjósandanum til armæðu. Ástráður bendir á að í kosningalögum sé ekki kveðið á um hvernig skuli staðið að þessu, í reynd sé tekið fram að auða seðla skuli meta með ógildum. Ekkert bann sé lagt við því að aðgreina auða seðla og ógilda. Ekki sé óeðlilegt að gerður sé greinarmunur þar á, enda felist í því að skila auðum seðli ákveðin pólitísk yfirlýsing.
|
