 Mbl.is greinir frá því í kvöld að Ríkharður Másson, formaður yfirkjörstjórnar Norðvesturkjördæmis, hafi gefið Lýðræðishreyfingunni frest til morguns til að laga framboðlista hreyfingarinnar í kjördæminu. Þar skipar Jón Pétur Líndal efsta sætið. Hvað varðar önnur sæti þá eiga kjósendur að raða í þau sjálfir. Þetta er hins vegar ekki leyfilegt enda ekki búið að leyfa persónukjör. Kjörstjórn mun úrskurða í málinu á morgun. Á lista Lýðræðishreyfingarinnar eiga að vera 18 nöfn eða tvöföld tala þingmanna. „Það er búið að skila 18 nöfnum en hinir [utan Jóns Péturs Líndals] eru í stafrófsröð. Við munum úrskurða um þetta á morgun. Ég held að þetta sé eitthvað sem við þurfum að skoða í öllum kjördæmum,“ segir Ríkharður í samtali við www.mbl.is
|
