 |
Sindri og Sigrún Ósk | „Ég kann mjög vel við mig í nýju starfi þótt auðvitað sakni ég Skessuhorns. Störfin eru þó ekki ólík í grunninn. Hér er iðulega mikið í gangi, líf og fjör. Maður er alltaf að hitta nýtt fólk og fást við ný viðfangsefni á hverjum degi. Starfið er því fjölbreytt og samstarfsfólkið frábært. En þetta tekur oft á. Vinnudagarnir verða stundum ansi langir og álagið mikið. Ég hef til dæmis ekki borðað kvöldmat heima hjá mér á þessu ári. En kostirnir við vinnuna eru margfalt fleiri en gallarnir. Ég held að mér sé óhætt að segja það,“ segir Sigrún Ósk Kristjánsdóttir fyrrverandi ritstjóri og núverandi þáttastjórnandi Íslands í dag á Stöð2. Frá því Sigrún og Sindri Sindrason tóku við þáttastjórn á stöðinni um áramótin hefur áhorf á þátt þeirra aukist um 60-70%. Rætt er við Sigrúnu Ósk í Skessuhorni sem kom út í dag.
|
