 Í dag klukkan 15:00 hefst opinn fundur með fulltrúum allra stjórnmálaflokka í Bíóhöllinni á Akranesi. Fundurinn er boðaður af forystu Verkalýðsfélags Akraness. "Þetta eru einar mikilvægustu alþingiskosningar sem haldnar hafa verið hér síðustu áratugi. Vel á fimmta þúsund kjósendur í Norðvesturkjördæmi eru búsettir á Akranesi, eða sem nemur 21% allra kjósenda kjördæmisins og því er mikilvægt að þeir sem gefa kost á sér til trúnaðarstarfa fyrir okkur kjósendur kynni stefnumál sín,” segir Vilhjálmur Birgisson, formaður Verkalýðsfélags Akraness. “Ég boða til fundarins á þeirri forsendu hversu gríðarlega mikilvægar þessar kosningar eru fyrir heimilin og fyrirtækin í þessu landi. Verkalýðsfélag Akraness vill fá skýr svör frá frambjóðendum flokkanna um hver úrræði þeirra séu fyrir fólkið og fyrirtækin í þessu landi en um þessar mundir blæðir íslenskum heimilum illilega vegna þess efnahagshruns sem hefur orðið í kjölfar bankahrunsins," segir Vilhjálmur.
|
Fundurinn er fyrirhugaður með þeim hætti að einn frambjóðandi frá hverjum flokki fyrir sig mun sitja í pallborði og gefst frambjóðendum kostur á framsögu og í kjölfarið munu verða leyfðar fyrirspurnir úr sal. Einnig flytur Vilhjálmur stutt ávarp í upphafi fundar.
“Verkalýðsfélag Akraness hvetur alla til að fjölmenna á fundinn og krefja frambjóðendur um skýr svör varðandi þeirra stefnumál og hvernig þeir hyggjast leysa vanda heimilanna og fyrirtækjanna í landinu,” segir Vilhjálmur.
|
