 "Ég vildi sjá að við drægjum lærdóm af því sem gerst hefur og gerðum ekki sömu mistökin aftur. Við verðum að temja okkur nýja hugsun á mörgum sviðum. Líklega skortir okkur víðsýni, við verðum að vera gagnrýnni og reyna að horfa meira fram í tímann en áður. Kannski er það líka að verða einn okkar mesti veikleiki að vera ekki nógu ráðdeildarsöm, sá eiginleiki, sem við vissulega bjuggum yfir áður, hefur látið undan í góðærinu. Við verðum að fara skynsamlega með það sem við eigum, þar með talið auðlindir þjóðarinnar. Í raun og veru erum við heppin, við eigum svo margt. Við höfum fullt af tækifærum og getum aukið lífsgæði okkar enn frekar. Við ættum líka að huga að því hvernig við getum orðið betur í stakk búið til að skapa. Ég held við getum bætt skólakerfið enn frekar í þá átt að hugsunin verði frjórri og gagnrýnni,“ segir Björg Ágústsdóttir sem um árabil var bæjarstjóri í Grundarfirði en hefur síðustu misserin starfað hjá ráðgjafarfyrirtækinu Alta.
Í Skessuhorni vikunnar er rætt við Björgu um reynslu hennar af bæjarstjórastarfinu og því sem hún hefur verið að starfa við síðan auk þess sem á góma bar ástandið í þjóðmálunum í dag.
|
