 Flutningabíll fauk út af veginum við Ölver í Melasveit laust eftir hádegi í dag. Farþegi í bílnum handleggsbrotnaði og var fluttur á Sjúkrahúsið á Akranesi. Ökumaðurinn slapp án teljandi meiðsla en var lemstraður. Bíllinn skemmdist mikið og verður ekki reynt að koma honum aftur á hjólin fyrr en veður gengur niður. Á staðnum var allhvassur vindur og fór í hviðum upp í 38 metra á sekúndu á vindmælinum á Hafnarmelum um svipað leiti og slysið varð.
Tíu ökumenn voru teknir fyrir of hraðan akstur í umdæmi lögreglunnar í Borgarfirði og Dölum í vikunni sem leið. Einn reyndist hafa ekið undir áhrifum áfengis og kom það í ljós eftir að hann hafði lent utan vegar skammt frá afleggjaranum að veiðihúsinu við Norðurá. Annar var tekinn við akstur undir áhrifum fíkniefna og var sá hinn sami auk þess án ökuréttinda.
| 
