 Töluvert hvasst hefur verið síðasta sólarhring á veginum við Hafnarfjall. Í gær fauk flutningabíll útaf í snarpri vindhviðu. Í morgun hefur einnig verið mjög hvasst á þessum slóðum og vind slegið upp fyrir 40 metra á sekúndu í verstu hviðunum. Eins og sjá má á meðfylgjandi mynd var veður nú klukkan 11 heldur farið að ganga niður. Hins vegar er full ástæða til að hvetja ökumenn til að sýna aðgát á þessum slóðum við þessar aðstæður í suðaustanátt. Sérstaklega er varhugavert að fara með hestakerrur, hjólhýsi eða tóma flutningabíla um svæðið þegar veður er með þessum hætti.
|
