Skessuhorn:

Gunnólfur ráðinn sveitarstjóri Langanesbyggðar

14. maí 2009

Gunnólfur Lárusson, fyrrverandi sveitarstjóri Dalabyggðar og oddviti N lista í sveitarstjórn, hefur verið ráðinn sveitarstjóri Langanesbyggðar. Hann er á förum í dag til Þórshafnar að skrifa undir samning og hefur þar störf strax. Í samtali við Skessuhorn segist Gunnólfur vera ánægður með að vera á förum austur, hann hafi verið einn af fjörutíu umsækjendum og að starfið legðist vel í sig. “Ég hef ekki starfað við annað en sveitarstjórnarmál síðatliðin 12 ár, var fyrst sem aðstoðarmaður sveitarstjóra í Dölum og staðgengill hans og síðan sveitarstjóri frá 2006 fram á mitt ár 2008 þegar sprakk upp úr meirihlutasamstarfinu og Grímur Atlason var í kjölfarið ráðinn sveitarstjóri.”

Eftir að Gunnólfur hætti störfum sem sveitarstjóri starfaði hann hjá Megin ehf. við leikskólabyggingu í Búðardal en hefur verið atvinnulaus undanfarna mánuði. “Maður var ósáttur við að hafa misst meirihlutann í sveitarstjórn á sínum tíma og þar með atvinnuna, en er ánægður nú með að vera kominn aftur með vinnu. Ég fer norður á eftir og lýk við samning við sveitarfélagið og byrja strax störf.” Áður en Gunnólfur flutti í Dalina hafði hann búið í Vestmannaeyjum frá 1976 en er uppalinn á höfuðborgarsvæðinu.

Í sveitarstjórn tekur nú sæti Eyþór Gíslason, 5. maður á N lista. Hann er starfsmaður hjá Vegagerðinni og formaður hestamannafélagsins Glaðs í Dölum. Áður hafði Guðjón Torfi Sigurðsson fv. skólastjóri, sem skipaði 3. sæti á N lista, farið úr sveitarstjórn þegar hann flutti á Ísafjörð árið 2007.