 Í nýlegum dómi Héraðsdóms Vesturlands er fyrrum gjaldkeri Íþróttabandalags Akraness dæmdur í sex mánaða skilorðsbundið fangelsi fyrir fjárdrátt á árunum 2002 til 2007. Dæmd refsing fellur niður að þremur árum liðnum ef ákærði heldur almennt skilorð á þeim tíma. Umræddur maður viðurkenndi skýlauslega brot sín að hafa dregið sér á sjöundu milljón króna á þessu tímabili, látið félagið greiða eigin reikninga og skotið undan bókhaldsgögnum til að hylja afbrotaslóð sína. Alls var það í 132 skipti á umræddu tímabili sem maðurinn dró sér fé. Í niðurstöðum dómsins segir að við ákvörðun refsingar hafi þess verið gætt að brotin eru umfangsmikil. Á hinn bóginn er litið til þess að ákærði er með hreint sakavottorð. Auk þess horfir það honum til málsbóta að hann hefur greiðlega gengist við brotum sínum, en upphaf málsins má rekja til þess að ákærði sagði sjálfur til brotanna.
|
