 Skemmtiferðaskipið MS Fram átti óvænta viðkomu í Grundarfirði síðastliðinn föstudag, en það var á undan áætlun. Skipið kom snemma morguns og hleypti farþegum í skoðunarferð um Snæfellsnes, en sigldi eftir það til Grænlands síðdegis sama dag. Skip þetta var smíðað í Noregi árið 2007 og er sérhannað til siglinga í norðurhöfum. Innréttingar eru að miklu leyti gerðar úr ull, leðri og eik og gefa skipinu norrænt yfirbragð, eins og segir í lýsingu á vef Grundarfjarðarbæjar um skipið. MS Fram er nefnt eftir skipi hins fræga norska ævintýramanns Friþtjof Nansen, sem stóð fyrir mörgum könnunarleiðöngrum um norðurheimskautið á landi og sjó. Það er 110 metrar á lengd, 12.700 tonn og rúmar 382 farþega sem í þessari ferð voru flestir frá Ameríku.
|
