 Fyrir skömmu kvöddu íbúar og starfsmenn Dvalarheimilisins Höfða á Akranesi fjóra starfsmenn sem látið hafa af störfum nýlega eftir langan og farsælan starfsferil. Ein af fjórmenningunum er Emilía Petrea Árnadóttir deildarstjóri dagdeildar, sem er sú eina sem eftir var af því starfsfólki sem byrjaði þegar Höfði tók til starfa 1. febrúar 1978. Hin þrjú sem nú létu af störfum eru Sigrúnu Björgvinsdóttur sem hefur starfað á Höfða við umönnun í 28 ár, Jónas Kjerúlf sem var umsjónarmaður fasteigna í rúm 20 ár og Ásthildur Theodórsdóttir sem starfaði við ræstingar í 19 ár. Guðjón Guðmundsson framkvæmdastjóri Höfða ávarpaði fjórmenningana, þakkaði störf þeirra og rakti farsælan starfsferil. Óskaði hann þeim góðs gengis á ókomnum árum og að þau mættu njóta eftirlaunaáranna við góða heilsu og farsæld.
|
