 |
Þáverandi stjórnarmenn í Norðurá árið 2006 | Stjórn Stangveiðifélags Reykjavíkur mun í fyrramálið á slaginu 7 hefja veiðar í Norðurá í Borgarfirði og þar með formlega laxveiðar sumarsins. Lax er nú genginn á millifossasvæðið í Norðurá. Í gærkveldi mátti sjá fisk sem lá á hefðbundnum stað á Berghylsbroti og því ljóst að veiðimenn sem opna ána í fyrramálið þurfa að leita fanga ofan Laxfoss. Ekkert benti til þess að lax kæmist í Laxfoss um liðna helgi þegar vatn var mikið og kalt, en síðan þá hefur vatnsmagn árinnar minnkað verulega og fossarnir engin hindrun fyrir þann silfraða, segir á vef SVFR. Norðurá hefur farið hríðlækkandi í vatni undanfarna daga. “Hið jákvæða er að lax getur nú gengið hraðar en ella og hvorki Laxfoss eða Glanni nokkur hindrun að ráði,” segja spenntir stjórnarmenn í SVFR.
|
