Skessuhorn:

Meirihlutasamningur í Borgarbyggð

13. janúar 2010

Búið er að gera opinberan málefnasamning sem fulltrúar Sjálfstæðisflokks og Framsóknarflokks hafa gert sín á milli vegna skipunar meirihlutastjórnar í Borgarbyggð. Skrifað var undir samkomulagið í gær. Þar segir meðal annars: “Fulltrúar ofangreindra framboða gera sér ljóst að sá mikli tekjusamdráttur sem sveitarfélagið hefur orðið fyrir í því efnahagsástandi sem nú varir á Íslandi krefst ábyrgrar fjármálastjórnunar. Jafnframt blasir við frekari tekjusamdráttur árið 2011. Þrátt fyrir þessa erfiðleika teljum við mörg tækifæri í sveitarfélaginu. Uppbygging síðustu ára hefur skilað sterkum innviðum og með markvissum aðgerðum má snúa vörn í sókn.”

Þá segir að tíminn fram til loka kjörtímabils verður nýttur til eftirfarandi verkefna:

• Að endurskipuleggja rekstur sveitarfélagsins með það að markmiði að hér verði áfram hægt að veita góða þjónustu á fjárhagslega sjálfbæran hátt.

• Í fræðslumálum verði unnið að nauðsynlegri hagræðingu án þess að dregið verði úr gæðum faglegs starfs.

• Aðhald verði aukið í öllum almennum rekstri og fjárfestingum.

• Stjórnsýsla sveitarfélagsins verður aðlöguð að gjörbreyttu ytra umhverfi.

• Stofnanir sveitarfélagsins verða aðstoðaðar við að ráðast í þá hagræðingu sem möguleg er.

• Leitað verði leiða til að efla atvinnulíf og skapa ný störf í samvinnu við íbúa og aðra hagmunaaðila.

Verkaskipting flokkanna verður með eftirfarandi hætti:

Forseti sveitarstjórnar: Björn Bjarki Þorsteinsson

Formaður byggðarráðs: Sveinbjörn Eyjólfsson

Sveitarstjóri: Páll S. Brynjarsson

Formaður fræðslunefndar: D-listi

Formaður umhverfis- og landbúnaðarnefndar: B-listi

Formaður skipulagsnefndar: D-listi

Formaður félagsmálanefndar: D-listi

Formaður tómstunda- og menningarnefndar: B-listi