 Nú er unnið við að loka nokkrum gluggum á annarri hæð í gamla Pósts og síma húsinu við Kirkjubraut á Akranesi. Broddi Þorsteinsson verkefnisstjóri fasteigna hjá Mílu, sem á þennan hluta hússins, segir ástæðuna vera hertar öryggiskröfur Póst- og fjarskiptastofnunar. “Þarna inni eru alla símatengingar Símans á Akranesi í kjallara og á annarri hæð, bæði gsm- og fastlínur. Ljósleiðarar liggja inn í kjallarann og þar er hýstur búnaður fyrir Vodafone líka og inn í húsið koma tengingar á örbylgjusamböndum frá mastrinu á lóðinni. Þetta þótti of berskjaldað með gler í gluggum svo við fengum leyfi bæjaryfirvalda til að loka þeim en reynum að gera það þannig að útlit hússins breytist sem minnst.”
|
