Skessuhorn:

Skemmti- og fræðslukvöld um UNIFEM

23. febrúar 2010

Fimmtudagskvöldið 25. febrúar verður skemmti- og fræðslukvöld á Landnámssetrinu í Borgarnesi þar sem starfsemi UNIFEM verður kynnt. Þetta eru samtök sem starfa innan vébanda Sameinuðu þjóðanna og vinna að velferð og mannréttindamálum kvenna víða um heim. Samtökin UNIFEM á Íslandi hafa undafarin ár verið mjög öflug í þessu alþjóðlega samstarfi og til dæmis var íslenskur starfsmaður, Kristín Ástgeirsdóttir, á vegum samtakanna í uppbyggingarstarfi í Kosovo. Þá hefur UNIFEM á Íslandi unnið markvisst að verkefnum í baráttu gegn kynbundnu ofbeldi eins og svokölluðum heiðursmorðum og umskurði. Með kynningunni er ætlunin að hvetja alla til að kynna sér þetta starf en kvöldið verður sambland af kynningu og skemmtun.

Dagskráin hefst kl. 20 með söng Katerínu Ingu Antonsdóttur. Síðan segir Steinunn Gyðu- og Guðjónsdóttir framkvæmdastjóri frá starfinu, Lina Mazar segir frá reynslu sinni af að vera kona í flóttamannabúðum í Írak, Halldóra Geirharðsdóttir leikkona flytur gamanmál og þær Ása Hlín Svavarsdóttir og Zsuzsanna Budai flytja nokkur Janis Joplin lög. Kynnir verður Sigríður Margrét Guðmundsdóttir. Aðgangur er ókeypis.