Skessuhorn:

Ráðherra skoðar hrognavinnslu HB Granda

25. febrúar 2010

Jón Bjarnason sjávarútvegs- og landbúnaðarráðherra, Jóhann Guðmundsson aðstoðarmaður hans og Jóhann Sigurjónsson forstjóri Hafrannsóknastofnunar skoða í dag hrognavinnslu HB Granda á Akranesi. Þeim til leiðsagnar eru Eggert Guðmundsson forstjóri og Gunnar Hermannsson vinnslustjóri. Hrognafrysting er nú í hámarki hjá fyrirtækinu og unnið allan sólarhringinn enda mikilvægt að vinna fiskinn sem ferskastan og áður en til hrygningar kemur. Hrognafylling og þroski er nú bestur í þeirri loðnu sem veiðist á Faxaflóa, betri en í loðnunni fyrir sunnan land. Frystigeta er 100 tonn á dag á Akranesi en þeim hrognum sem ekki næst að frysta þar er ekið norður á Vopnafjörð til frystingar.

Að sögn Gunnars Hermannssonar vinnslustjóra gengur hrognafrystingin vel. Við vinnsluna eru 30 störf, en unnið er á vöktum þannig að um 50-60 manns koma að þessu. Gunnar segist afar heppinn með starfsfólk, vel hafi gengið að fá vant fólk til starfa.

Nánar verður fjallað um hrognafrystinguna á Akranesi í máli og myndum í næsta Skessuhorni.