2. maí 2012 14:01

Sævar Ingi Jónsson

Þuríður J. Kristjánsdóttir prófessor 85 ára

Þann 28. apríl síðastliðinn fagnaði Þuríður Jóhanna Kristjánsdóttir frá Steinum í Stafholtstungum 85 ára afmæli sínu. Þuríður er yngst fimm barna hjónanna Kristjáns Franlíns Björnssonar bónda og smiðs og Jónínu Rannveigar Oddsdóttur húsfreyju. Hún útskrifaðist sem kennari og kenndi m.a við Hagaskólann í Reykjavík en nýtti hvert tækifæri til frekara náms og útskrifaðist með doktorspróf frá Ríkisháskólanum í Illinois árið 1971. Árið 1973 var hún skipuð fyrsti prófessor Kennaraháskólans og varð jafnframt fyrst kvenna til að gegna embætti í sálarfræði við íslenskan háskóla. Þá var Þuríður jafnframt Konrektor við skólann frá 1983-1987.

Þuríður hefur alla tíð notið mikillar virðingar samstarfsfólks síns og nemenda á öllum skólastigum enda afar farsæl í störfum sínum. Hún hefur fengist við ýmis önnur störf í gegnum tíðina og skrifað og þýtt efni í blöð, tímarit og bækur. Þá hefur hún unnið ötullega fyrir Sögufélag Borgarfjarðar og m.a. verið ritstjóri og einn af höfundum af seinni bindum Borgfirskra æviskráa og er enn að.

Í tilefni afmælis Þuríðar hefur samantekt um ævi hennar og störf verið sett á heimasíðu Safnahúss: www.safnahus.is. Um leið og Þuríði eru fluttar bestu hamingjuóskir í tilefni afmælisins vill starfsfólk Safnahúss Borgarfjarðar þakka henni gott samstarf og einstaka velvild og hjálpsemi í garð safnanna í gegnum tíðina.

Fyrir hönd starfsfólks í Safnahúsi

Sævar Ingi Jónsson, héraðsbókavörður

Til baka

yfirlit greina