11. júlí 2012 13:01

Guðbjörg Róbertsdóttir

Grjótfylling út í Krókalón

Nú ættu bæjarbúar á Akranesi að leggja leið sína á nýlegan göngustíg sem liggur með Krókalóninu og sjá fyrir sér þær breytingar sem verða á svæðinu þegar og ef ný hús rísa samkvæmt fyrirliggjandi deiliskipulagstillögu bæjaryfirvalda. Annað húsið (byggingarreiturinn) á að vera af svipaðri stærð og vera samsíða skipasmíðahúsinu sem þar er á Grenjunum, en samkvæmt teikningu dugir breidd sjóvarnargarðsins, sem þar er nú, ekki til og þyrfti landfyllingu undir það út í Krókalón. Síðan er gert ráð fyrir 20 metra breiðri grjótfyllingu út frá þessari ætluðu nýbyggingu og út í Krókalónið alls 0,6 ha.

Þetta er það sem ég les út úr auglýsingu um tillögu að breytingu á deiliskipulagi, Grenjar-hafnarsvæði, sem til næstu mánaðamóta er til kynningar og athugasemda fyrir þá sem áhuga hafa. Sjá heimasíðu Akraneskaupstaðar.

Á þessu svæði rís skerjagarðurinn hæst, Vesturflös/Norðurflös, og yrði sorglegt og nær óbærilegt ef hluti hans hyrfi okkur sjónum undir eða bak við grjótfyllingu. Og Krókalónið gjörbreytist og spillist.

Þetta er galið. Ég leyfi mér að fara fram á að menn nái markmiðum sínum um aukið athafnarými án þess að skerða Krókalónið frekar en orðið er.

Guðbjörg Róbertsdóttir

Til baka

yfirlit greina