30. maí 2012 09:30

Anna Bergsdóttir

Nýir iPad teknir í notkun í Grunnskóla Grundarfjarðar

Í Grunnskóla Grundarfjarðar hefur staðið fyrir dyrum að endurnýja tölvukostinn að hluta. Skólinn hefur verið ágætlega settur hvað varðar tölvubúnað síðustu ár en nú var komið að því að endurnýja. Ákveðið var að kaupa iPad í stað fartölva eins og áður hefur verið gert og eru nú 18 iPad komnir í hús. iPad býður upp á marga skemmtilega möguleika í kennslu og nýtist því kennurum vel í því að auka fjölbreytni kennsluhátta og nýta ýmsa möguleika sem ekki hafa verið fyrir hendi áður. Nemendur eiga eflaust eftir að taka þessari nýjung fagnandi því sú kynslóð sem nú sækir grunnskóla landsins er vanari lyklaborðum og tölvum en blýanti og blaði. Það gefur því auga leið að skólarnir verða að færa sig nær þessari þróun.

Í grunnskóla Grundarfjarðar eru nú rúmlega 100 nemendur. Þeim hefur fækkað hratt síðustu ár og samfélagið í Grundarfirði er að eldast. Teikn eru á lofti um að aftur verði viðsnúningur á næstunni, börnum á leikskóla er að fjölga, yngra fólk að flytja í bæinn og því stígandi nemendafjöldi á næstunni.

Nýr aðstoðarskólastjóri hefur verið ráðin að grunnskólanum en það er Helga Guðrún Guðjónsdóttir sem tekur við starfinu 1. ágúst næstkomandi. Hún hefur víðtæka reynslu af skólastarfi bæði stjórnun og kennslu auk þess að vera með Dipl.Ed próf í uppeldis- og menntunarfræðum á stjórnun menntastofnana. Samhliða starfi við grunnskóla hefur hún verið formaður UMFÍ síðustu ár.

Í haust mun grunnskólinn taka þátt í þróunarverkefni sem styrkt er úr Sprotasjóði í samstarfi við Grunnskólann í Sandgerði, Stóru-Vogaskóla, Umboðsmann barna, Unicef og UMFÍ. Nafn verkefnisins er „Lýðræði er leikur einn“ og inntak þess er virkt lýðræði, mannréttindi og samskipti í skólum. Verkefnisstjóri er Guðrún Snorradóttir.

Anna Bergsdóttir,

skólastjóri Grunnskóla Grundarfjarðar

Til baka

yfirlit greina