Guðríður Guðbrandsdóttir elst Íslendinga á afmæli í dag

Á Byggðasafni Dalamanna að Laugum í Sælingsdal kennir ýmissa grasa. Þar er m.a. ljósmynd af þeim nöfnum Guðríði Jónsdóttur (1832-1923) og sonardóttur hennar Guðríði Guðbrandsdóttur sem fædd er 23.5.1906 og er frá Spágilsstöðum í Dölum. Guðríður yngri er elst Íslendinga 107 ára, fagnar afmæli sínu í dag.

Sigur í fyrsta leik Skallagrímsmanna

Keppni í 4. deild karla á Íslandsmótinu í knattspyrnu hófst í þessari viku. Tvö lið af Vesturlandi leika í B-riðli deildarinnar, Skallagrímur og sameiginlegt lið Snæfells og Geislans. Snæfell/Geislinn lék sinn fyrsta leik gegn liði Berserkja í Reykjavík á mánudaginn þar sem heimamenn sigruðu 3-0. Borgnesingar léku aftur á móti sinn fyrsta leik á Íslandsmótinu í gær á heimavelli gegn liði Stál-úlfs. Heimamenn léku vel í leiknum og sigruðu 3-1. Viktor Ingi Jakobsson skoraði tvö marka Skallagrímsmanna, þar af eitt úr víti, og þá skoraði Valur Orri Valsson eitt, einnig úr víti. Góð mæting var á Skallagrímsvöll, um 170 manns komu til að styðja við bakið á sínum mönnum. Til gamans má geta þess að Skallagrímur varð þar með eina liðið á Íslandi sem hefur leikið í öllum deildum Íslandsmótsins, en 4. deildin var stofnuð fyrir leiktímabilið sem nú er hafið.

Hundar sem valda usla í búfénaði eru réttdræpir

Tveir aðkomuhundar komust í lambfé á bæ í Borgarbyggð í morgun. Sauðfjárbóndi á viðkomandi jörð lét þess getið í Fésbókarfærslu í dag að beita hafi þurft ákvæði í 32. grein lögreglusamþykktar fyrir Borgarbyggð. Í greininni er fjallað um dýrahald og lausagöngu búfjár. Þar segir m.a. orðrétt: „Hundar, sem ráðast á menn eða elta skepnur út um hagann, eru réttdræpir hvar sem til þeirra næst.“

Af gefnu tilefni er rétt að minna hundaeigendur á þessar almennu reglur sem víða eru í gildi og forðast að hafa hunda lausa í nágrenni við lambfé á vorin.

Dúmbó og Steini í Eldborgarsal Hörpu í september

Hin gamla en síunga hljómsveit Dúmbó og Steini frá Akranesi hélt stórtónleika í Bíóhöllinni á Akranesi sl. föstudag fyrir troðfullu húsi. Verða aðrir tónleikar annað kvöld, föstudag, sem fyrir löngu er orðið uppselt á. Sjaldan eða aldrei hafa forsvarsmenn Bíóhallarinnar verið jafn fljótir að selja upp aðgöngumiða á viðburði, eins og á báða þessa tónleika. Nú hefur því verið ákveðið að hljómsveitin fari í örlitla útrás og haldi tónleika í Eldborgarsal Hörpu í Reykjavík í haust, nánar tiltekið laugardaginn 14. september. „Það mætti halda að maður væri að „plögga“ endurkomu Bítlanna, slíkar hafa viðtökur almennings og gesta verið við endurkomu Dúmbó og Steina. Því hef ég nú ákveðið að fá hljómsveitina í lið með mér og tekið á leigu stærsta salinn í Hörpu næsta haust og er markmiðið að sjálfsögðu að fylla húsið, halda gott partý og gera ógleymanlega stund,“ segir Ísólfur Haraldsson framkvæmdastjóri í Bíóhöllinni í samtali við Skessuhorn.

Bilun kom upp í strandveiðibáti

Strandveiði báturinn Fönix SH lenti í því óhappi í gær að drif bátsins bilaði þegar hann var á leið til veiða. Komu nærstaddir bátar Fönix til aðstoðar þar sem báturinn bilaði skammt frá innsiglingunni í Ólafsvík. Jökull SH tók Fönix í tog til hafnar í Ólafsvík þar sem báturinn var tekinn á land og skemmdir kannaðar.