Tveir fluttir með þyrlu til Reykjavíkur eftir rútuslys við Grundarfjörð

Alvarlegt slys varð um klukkan hálf tvö í dag um fimm kílómetra vestan við Grundarfjörð á Snæfellsnesi þegar rúta og fólksbíll lentu í árekstri. Mikill viðbúnaður var vegna slysins og voru m.a. tvær þyrlur Landhelgisgæslunnar kallaðar út. Önnur þeirra fór hins vegar áleiðis vestur og sótti tvo slasaða menn sem hún flutti með sér á Landsspítalann í Fossvogi. Erfiðar aðstæður voru á slysstað, strekkingsvindur, suðaustanátt sem jafnan getur verið slæm á þessum slóðum og rigning. Alls voru fimmtán farþegar í rútunni, allt erlendir ferðamenn, en tveir voru í húsbílnum. Beita þurfti klippum til að ná farþegum húsbílsins út. Fjöldahjálpamiðstöð Rauða krossins var opnuð í Grundafirði og voru farþegar rútunnar fluttir þangað til aðhlynningar. Meiðsli þeirra eru talin minniháttar. Samhæfingamiðstöð almannavarna í Skógarhlíð var einnig virkjuð vegna slysins.

Álegg hrafnanna á Grundartanga

Hrafnar taka oft ástfóstri við ákveðna staði og helga sér umráðasvæði til búsetu. Það á einnig við um hrafnshjón sem búa á Grundartanga, í daglegu tali kallaðir Álverskrummarnir. Hröfnunum virðist vera sama um allt sem heitir segulsvið í nágrenni verksmiðjunnar því þeir hafa búið sér til laup á stigapalli fyrir utan kerskála Norðuráls. Búið er að koma fyrir upptökuvél í nágrenni laupsins og bíða starfsmenn spenntir og munu fylgjast með ungunum þegar þeir klekjast úr eggjunum.

Komu Esjari til aðstoðar

Björgunarbáturinn Björg í Snæfellsbæ fór í gær sex mílur norður af Rifi á Snæfellsnesi til aðstoðar rækjubátinum Esjari SH. Var Esjar á togi þegar stykki milli vélar og skrúfuöxuls brotnaði með þeim afleiðingum að báturinn varð stjórnlaus.  Að sögn Páls Stefánssonar skipstjóra á Björgu var ágætis veður á þessum slóðum og gekk því greiðlega að draga Esjar til hafnar í Rifi.

Lést í vélhjólaslysi

Maðurinn sem lést í vélhjólaslysi á Akranesi sl. fimmtudag hét Bergur Júlíusson, 51 árs og búsettur í Reykjavík. Bergur var skipverji á togaranum Sturlaugi Böðvarssyni AK og var þegar slysið átti sér stað á heimleið eftir vinnu um borð í skipinu. Bergur lætur eftir sig son og tvær dætur á aldrinum 19-26 ára, aldraða foreldra, systkini og sambýliskonu.

Baldur fer aukaferðir þar sem Kjálkafjörður er lokaður

Breiðafjarðarferjan Baldur fer aukaferðir í dag, laugardag, vegna þess að Vestfjarðavegur nr. 60 er lokaður í Kjálkafirði sökum hættu á skriðuföllum. Baldur lagði af stað frá Stykkishólmi klukkan níu í morgun og fer frá Brjánslæk kl. 12.00. Áætlað er að um 150 þúsund rúmmetrar af mold og grjóti hafi fallið á veginn í Kjálkafirði í apríl og var veginum lokað í gærkvöldi um óákveðinn tíma þar sem hætta er á frekari skriðuföllum. Fréttavefurinn www.mbl.is greindi frá.