Skessuhorn:

Vestlensk fyrirtæki á mikilli sjávarútvegssýningu í Brussel

24. apríl 2012

Sjávarútvegssýningin, European Seafood Exposition, var formlega opnuð í Brussel í morgun og mun hún standa fram til fimmtudags, en sýningin er sú stærstu á þessu sviði í heiminum. Meðal þátttakenda eru fyrirtæki af Vesturlandi og með starfsstöðvar þar, svo sem Skaginn á Akranesi og HB Grandi. Samhliða sýningunni er haldin sýningin Seafood Processing Europe sem vettvangur þeirra fyrirtækja sem framleiða vinnslutæki eða bjóða upp á þjónustu tengda útflutningi á sjávarafurðum. Þar er Skaginn með bás þar sem m.a. eru kynntar nýjungar fyrirtækisins varðandi lausfrysta.

Svavar Svavarsson, markaðsstjóri HB Granda, stendur vaktina í Brussel með sínu fólki, en alls eru 15 manns frá fyrirtækinu til að kynna sýningarbásinn. Svavar á von á góðri sýningu og að fjölmenni leggi leið sína á sýningarbás félagsins,nr. 839-1, að því er fram kemur á heimsíðu fyrirtækisins.

Forseti Íslands, Ólafur Ragnar Grímsson heimsótti íslenska þjóðarbásinn í sýningarhöll 6 í morgun og hélt erindi á hádegisverðarfundi Iceland Responsible Fisheries þar sem nýja íslenska umhverfisvottunarkerfið fyrir ábyrgar fiskveiðar var í sviðsljósinu.